Донорлық функцияны жүзеге асырғаннан кейін әрбір донорға жұмыс орнына көрсету үшін бекітілген үлгідегі анықтама беріледі.

Бұл анықтама не береді?

«Халық денсаулығы және денсаулық сақтау жүйесі туралы» Кодекстің 208-бабына және Қазақстан Республикасы Еңбек кодексінің 126-бабына сәйкес 2 демалыс күні: 1 донация күні + 1 қосымша күн.

Бұл ретте, жұмыс беруші донордың жұмыс орнын (лауазымы) және орташа жалақысын сақтайды.

Донорлық анықтаманың қолданылу мерзімі қандай?

Анықтама донация жасалған күннен бастап 1 жыл бойы жарамды. Мысалы, егер сіз 2020 жылдың 1 маусымында қан немесе оның компоненттерін тапсырсаңыз, онда анықтаманың қолданылу мерзімі 2021 жылдың 31 мамырында аяқталады.

Демалыс күндерін қашан пайдалануға болады?

1-ші күні донация күні пайдаланылуы мүмкін.

Алайда, егер донор жұмыс берушімен келісім бойынша донация жасалған күні жұмысқа шықса, онда оның қалауы бойынша оған басқа демалыс күні берілуі тиіс немесе бұл күн жыл сайынғы еңбек демалысына қосылуы мүмкін.

Жұмыста жанжалды жағдайларды болдырмау үшін басшылықты Облыстық қан орталығына (немесе облыстық қан орталығының көшпелі жұмысы жүзеге асырылатын жерге) келетін сапар туралы АЛДЫН АЛА хабардар етуге кеңес береміз.

2-қосымша демалыс күні жыл сайынғы ақылы демалысқа қосылуы немесе қан немесе оның компоненттерін тапсырған күннен кейін бір жыл ішінде басқа уақытта әкімшіліктің келісімі бойынша (бірінші басшының атына өтініш жазу) пайдаланылуы мүмкін.

НАЗАР АУДАРЫҢЫЗ!

Егер донация жұмыстан босатылған немесе қызметкердің демалысы кезеңінде жүргізілсе, жұмыс беруші ТЕК 1 демалыс күнін ғана береді!